UM ILFS

Fiskeldi hefur um langt skeið verið sú grein innan matvælaiðnaðarins sem vex hraðast. Aukning fólksfjölda á heimsvísu og batnandi lífsgæði hafa gert að verkum að eftirspurn eftir laxi hefur aukist hraðar en framboð.

Gæði afurða úr eldislaxi eru orðin mikil og er hann vinsæl matvara víða um heim. Laxeldisstöðin í Viðlagafjöru mun framleiða hágæða matvöru með hreinni umhverfisvænni orku í hreinum sjó við hagstæðar aðstæður en sjávarhiti í Vestmannaeyjum er sá hæsti umhverfis Ísland. Affall verður hreinsað frá stöðinni og úrgangur nýttur eftir fremsta megni. Seiði verða bólusett en engin lyf verða notuð í eldinu. Með því verður sköpuð náttúruleg hágæða matvara með sjálfbærum hætti.

Það er metnaður okkar að starfa í sátt við samfélag og náttúru og byggja upp frábæran vinnustað með besta fáanlega starfsfólki sem völ er á. Eldið verður staðsett á norðaustanverðri Heimaey á svæði sem hefur verið nýtt sem náma undanfarin ár. Svæðið er mikið raskað en ætlun félagsins er að hafa allt umhverfi eldisins til fyrirmyndar.

Að vinna og búa í Vestmannaeyjum

Vestmannaeyjar er spennandi staður fyrir unga sem aldna til að búa á með fjölskyldu. Með tæplega 5000 íbúa eru allir innviðir til staðar svo sem leik-, grunn- og framhaldsskóli með fjölbreyttar námsbrautir. Öflugt íþróttastarf er á eynni þar sem lið kvenna og karla spila í efstu deildum bæði í handbolta og fótbolta ásamt því að einn besti golfvöllur Íslands liggur á strönd Atlantshafsins. Mikill og vaxandi ferðamannastraumur til Vestmannaeyja byggir enn frekar upp innviði sem tengjast dægrastyttingu, veitingahúsum og útivist.

Landslag er stórkostlegt með óendanlegum möguleikum til göngu og hlaupa enda er eitt fjölmennasta víðavangshlaup Íslands haldið í Vestmanneyjum.

Vestmannaeyjar draga til sín fjölmarga gesti yfir sumarið. Mörg stór íþróttamót eru haldin með þátttöku þúsunda barna og foreldra þeirra. Í byrjun ágúst er haldið stærsta útihátíð á Íslandi í Vestmannaeyjum með þátttöku heimamanna og gesta.